2019 Covid-19 zawtnak a chuah hnu in vawlei cung ramkip harnak ton a si cio bantuk in India ram Delhi Chin ralzaam zong harsa ngai in an um tiah kan theih.
Covid-19 ruang ah an harsatnak he pehtlai in Delhi Chin ralzaam lei riantuantu Salai Cung Dawt nih, “Covid-19 a chuah hnu in Delhi Chin ralzam kan harsa ngai. March thla in khan erhkhumh (Lockdown) a si cang, nihin tiang erhkhumh a si peng rih. Delhi Chin ralzaam kan i cawmnak bik hi Company riantuan le ramdang theihhngalh sin ah thil kuat hna hi a si. Erhkhumh hnu in Company riantuan cu a ngah ti lo, Aluancia thla 4 hrawng in khan cun, erhkhumh hi an dinhdorh, leng chuahvah a ngah cang ko nain, Chin ralzaam tampi rian an tuan tawnnak pawl ah an lut than kho ti hna lo. A ruang cu, riantuan ding a harsa deuh cang, voidang bantuk in a um ti lo ti khawh a si. Cun erhkhumh hnu in, Ramdang thilkuat hi a harsa ngai cang, Foreign Post Office le Local Post Office, thil kuatnak pawl hna hi an phih pah, cu leng ah Chin ralzaam nih a hlan bantuk in thil an kuat mi a tluang ti lo.
Eidin hi UNHCR lei zong biatak tein an i zuam, Facang Chiti, Kalape, Cini ti bantuk hi Chin ralzaam card a ngei mi cu an phawtzamh ve lengmang, eidin hi cu UNHCR bawmhnak, Ramdang lei in bawmhnak an rak kan kawl piak mi, tibantuk thawng in nihin tiang cu mualpho ngai ngai in kan um rih lo ti khawh a si. Asinain Inn man pek awk a ngei lomi an tam pah ngai cang. Atu zong ah inn man thla zeimawzat ka ba a timi an um pah rih. Inn man kong hi cu UNHCR zong nih bawmhnak a pek khawh lo tikah, hmailei ah kan buai te kho tiah ka ruah. Atu kan dirhmun ahcun India Cozah he hin buainak kan ngei lo ti zong in chim khawh a si. Phundang in chim ahcun, Malaysia bantuk in Cozah nih dawi, tlaihkhih ti bantuk kan tong lo. Asinain kan buai tawnnak cu, anmah India minung lak ah mithalo, ralzaam a rem lomi an um pah ve theu. Cutikah Chin ralzaam chung in kutthlak, vuak le velh a tuar mi an um pah ve lengmang. Cozah lei nih cun dawi, tlaihkhih kan si lo nain anmah India minung, inn pawng karlak minung sin in vanchiat kan ton sual caan a um pah tawn,” tiah The Hakha Post ah a chim.
“Chin ralzam chung in Covid-19 zawtnak a ngei mi an um pah, nain an tam lo. Cun Pathian thawng in an dam colh ko hna. A tambik Zarh 2 Siizung ah an um in cun an dam hna. Nihin tiang ah minung 10 leng hrawng cu Covid zawtnak an ngei ve hna nain an dam colh dih, atu ah hin cun minung pakhat hnih te zawtnak a ngei mi an um rih i a si. Cu hna zong cu a zualhma tuk an si lo, a zualhma tuk an si lo caah Siizung zong ah um loin, inn ah an i zohkhenh ko hna,” tiah a chimchap.
India ram Delhi Chin refugee milu hi 3200 hrawng an si, CRC nih cun 3020 hrawng kan si tiah an langhter pah tawn. Hi chung ah hin ralzam sinak a sok ko nain case reject mi hi minung 22, Pending (Case zoh than ding mi) 10 hrawng, Ralzam sinak a sok liomi hi 10 hrawng an si, tiah kan theih.
