Atu lio vawleicung ram zeimawzat a cul cang mi le Myanmar ram zong ah kan ton cuahmah mi COVID-19 ruangah Malaysia Cozah nih March 31 tiang Lockdown a chiah mi April 14 tiang a ni a thial than ca ah Malaysia khuasa Chinmi tampi harnak kan tong tiah Chin Youth Organization Malaysia lutlai Andrew Tum Tling sin in kan theih.
Andrew Tum Tling nih, “Malaysia Chinmi kan dirhmun hi March 18-31 tiang Cozah nih Lockdown a tuah. Cu hnu ah COVID-19 in a zaw mi an karh chin lengmang ruang ah April 14 tiang Cozah nih Lockdown a tuah than. Cun, Cozah nih nawl a chuah mi Movement Control Oder ruang ah Khrihfabu kip biakinn zong a khar dih. Malaysia cu ralzaam dirhmun in khua kan saknak a si ca ah tuancop eicop in a ummi chungkhar tampi kan um. Cozah nih Lockdown a tuah hlan in rian cantling a rak tuan ti lomi chungkhar zong tampi kan um ca ah eidin kong ahcun kan lungre a thei tuk lo nain inn man pek ding ah lungrethei in kan um,” tiah a chim.
2020 March 31 tiang ah COVID-19 zawtnak hrik ngei minung 2626, a thi mi minung 37 le damnak a hmu than mi minung 479 an si cang tiah kan theih.
Cun, “Din-ei kong ah lungrethei in kan um te rua lai tiah kan ruah nain Pathian a tha i Local minung bawmtu hna sin ah din ei, facang, chiti, Arti tibantuk bawmhnak tete cu Chinmi umnak sang zeimawzat ahcun an pek pah lengmang cang hna. Amah belte Malaysia cu inn man hi a tam tuk ca ah inn man kong ah lungrethei in um cio a si. Malaysia Chin Refugee chung in harsa taktak mi hna zong ICC hruainak in min kan lak hna i UNHCR sin ah bawmhnak halpiak an si. UNHCR lei in Chin ralzaam bawmhnak belte atu tiang ahcun a um rih lo,” tiah a chimchap.
Malaysia ahhin ralzaam dirhmun in a um mi Chinmi dihlak minung 4000 leng an si i, Chinmi chung in COVID-19 zawtnak a ngah mi cu an um rih lo tiah kan theih.
