COVID-19 ruang ah Hakha hrawng thil man an kai i, siidawr, facang dawr le thil phuntling zuarnak (kungsungsan) pawl thil man an kai ahcun a herh ning in kan kham hna lai, kai hrimhrim hlah u tiah Hluttaw Speaker Pu Zo Bawi nih March 24 ah ralrinnak bia a chim.
“COVID-19 he pehtlai in thawngpang an theih ruang ah Hakha dawrthluan ah minung i tiang in thil an caw. Thil man an kaiter sual ahcun kan kham hna lai. Zeicahtiah, thilphur motor cu kan luhchuahter peng ko lai. A dang line-car (khualtlawnnak motor) le pumpak ngeih mi motor zong kan kham dih. Asinain, facang le tirawl dangdang a phur mi motor kan kham lo ca ah thil man kai hrimhrim hlah u. Nan kai ahcun a herh ning in tawlrel le kham nan si lai,” tiah Chin Ramkulh Hluttaw Speaker Pu Zo Bawi nih The Hakha Post ah a chim.
March 24 tiang ah thil man a kai ngaingai cu a um rih lo nain ralrin in thil caw an tam ca ah thil man a kai sual lai ti an phan mi kong he pehtlai in atu bantuk in Hluttaw Speaker Pu Zo Bawi nih ralrin peknak bia a chim hi a si.
