COVID-19 ruang ah phihkhar mi tete a um i Chin Ramkulh khuate tampi le nifatin tangka luut a ngei lo mi hna eidin lei harnak a tong mi tampi an um, tiah Chin Ramkulh Cozah Social Affairs Minister Pu Pau Lun Min Thang nih May 7 ah a chim.
“Nizaan naite tiang khan ka sin ah ca in siseh, telephone in siseh, an hun ka chimh. Ramkomh Cozah nih nifatin tangka luut a ngei lo mi hna bawmhnak a pek hna nain chikhat ca lawng a si. Phundang cun, zatuak 20% lawng kan i thathnempi. Tahchunhnak ah ka ruah bal lo mi Tonzaang Peng in khua pakhat hoi cu an har ngaingai. Ruahhaang a tla pah fawn cang i lamsuul a chia. Annih hoi cu Kalaymyo lei ah facang a caw mi an si. Cu lawng si lo, Thantlang Peng, Rih lei le India ramri, Mizoram ramri tibantuk khuate cheukhat cu India ram facang a ei mi an si. Check-gate pawl, ramri gate pawl an phih tik ah eidin an har ngaingai. Khuapi he aa naih mi khuate cheukhat belte cu an i ning deuh ngaingai ko. Asinain, COVID-19 zawtnak a chuah hnu, thla hnih chung hrawngte ah hin nifatin tangka luut a ngei lo mi cu an har ngaingai ko. Kanmah Cozah lei nih kan bawmchan kho fawn hna lo i ka lung a tha lo tuk,” tiah Minister Pu Pau Lun Min Thang nih The Hakha Post ah a chim.
Hi kong ah Minister Pu Soe Htet zong nih, “Chin Ramkulh Peng 9 ca ah, Peng 1 ah facang tun 500 cio laakhruak hman ding in kan chiah ko. Asinain, a tlangpi cun, nifatin tangka luut a ngei lo mi hna harnak a tong mi cu an tampi,” tiah The Hakha Post ah a chim.
Hiti nifatin tangka luut a ngei lo mi hna hi rian ngan deuh pawl kha phihkhar le ngol a si tik ah riantuan ding an ngei lo. Cheukhat rian cu Cozah tender zong a si i cun,company dangdang zong nih rian an phih ca ah a si, tiah kan theih
