COVID-19 zawtnak a chuah hnu in Myanmar ram sifahnak cu let 8 hranwg a kai tiah ram kip ah khuasak tintuk harsatnak hlethlaitu bu America hrambunh IFPRI nih thannak a tuah tiah kan theih.
IFPRI lutlai nih a chim dan ahcun Yangon, Mandalay, Sangain le Magau te hna ah hlethlainak tuah mi a si i, tu bantuk in Myanmar rammi mizapi nih harsatnak kan tonmi cu thanh ca in an chuah tiah kan theih.
Hi kong he pehtlai in Mr Headey nih “COVID-19 zawtnak nih Myanmar ram a phak hnu April thla in phihkharnak (lockdown) an chiah thawk in khuapi chung ah khuasak tintuk harsatnak a karh ngaingai zatuak 7% in zatuak 30% tluk karh. Cun khuate lei zong ahhin cu bantuk tho in harsatnak an ton ve. June thla inkhan tlawmpal cu aa van i zia deuh, nain August thla inkhan Rakhine ramkulh ah a chuak mi COVID-19 zawtnak hrik a phak thawk in sifahnak cu a karh than i zatuak 60% a karh i, thinphan ngaingai awk thil a si cang,” tiah a chim.
Khuapi chung le khuate chung zong ah hlathlainak cu inndawng 2000 tluk sin ah tuah a si i, khuate lei le khuapi harnak hi zeitluk indah aa hlau timi kong ah Hlathlaitu lutlai nih “khuapi ahhin fak ngai in harsatnak nih a phak hna. Sehzung hna khar a van si, Taxi khaltu zong an van har i, market zei maw zat kharter an si hna i, riantuantu hna rian lo in harsatnak fak an tong cio i, ram chung khuasaknak fak tuk in a van hnursuannak cu a si,” tiah an chim.
Cun “khuate lei ahhin eidin i deuh lonak hna an tong, hmunhma ngei lo, tlanglo ngei lo le lei hna ngei lo mi hi a hleice in khuate ahcun harsatnak nih a phak khun hna. Khuapi tuhi fak dueh ngai in COVID-19 zawtnak hrik ruangah harsatnak an tuar,” tiah Mr. Healey nihcun a chim chap.
Hlethlainak tuahtu lutlai Mr Healey nih “mizapi nih an tonmi harsaknak caah cozah nih bawhnak a pekmi 20000 Kyats nihhin zeipipa khi thathemnak a pe tuk hna lai lo caah 60000 Kyats tal in si kho sehlaw cu a tha ngai ko hnga. Nain voitam in van bomh ve ding ahcun cozah budget tam ngai a herh ve caah thilharsa ngaic cu a si ve,” tiah a chim. (Ref: VOA).
