Atu lio vawleicung ram 100 leng nih an tuar cang mi COVID-19 (Coronavirus) zawtnak in i runven khawhnak ca ah Mizoram Cozah nih Chin-Mizo ramri luhnak gate phih ding in nawl a chuah i, India ram Bible cacawbg Chin Bible siangngakchia tlunkal nakding ah an lungre a thei tiah kan theih.
2020 March 9 ah Mizoram Chief Minister Pu Zoramthanga nih a hruai hna i Covid-19 kong he pehtlai in Emergency Meeting a tuah pi hna. Hi an meeting ah bia an chah mi cu Myanmar le Bangladesh lei in ramdang mi Mizoram chung ah luhter lo ding in ramri gate cheukhat a phih ter hna tiah kan theih.
Hi kong he pehtlai in Saiha pengkomh uktu bawi chang Malsawmtluanga nih, “Atu ramri luhnak kan phih mi khua hna cu Lodaw, Chapi, Lopu, Khaikhy, Zyhno, Lomasu, Iana, Siasi, Laki le Khopa an si. Gate kan phih mi khua dihlak ah khua 10 a si. Atu bantuk in nawl kan chuah zong hi kan i runven khawhnak ca ah a si. Hi zawtnak hi tihnung ngai mi a si ca ah kanmah lei tiang a kan phah lai lo ti chim awk a tha lo. Abik in ramleng minung cu kan luh ter hna lai lo. Ramchung a ummi zong khualtlawn vakvaih a ngah lai lo. Hi nawl kan chuah mi ngai lo in a um i ram chung in a chuak mi poh cu phung ning tein dan kan tat hna lai,” tiah The Hakha Post ah a chim.
Cun, “Atu hi India ram ah Bible sianginn a kai mi cu kan lungre a thei ngai ko. India ram chung ah minung 5 zawtnak a ngei mi an hmuh cang hna i lungre thei ngai kan si. Atu hi sianginn zong kan khar pah dih cang, camipuai zong kan dih cang i nu le pa sin ah tlun kan i tim cio. Asinain hi zawtnak ruang ah Laitlang luhnak an phih ca ah tlung kho lo ding in a ummi minung kan tam pah ngai. Bangalore tiang a phan cang mi zong an um nain laitlang chung taktak ahhin cun an luh khawh lai ka zum lo,” tiah Karela State ah Bible sianginn a kai mi Salai Thomas Lian nih The Hakha Post ah a chim.
Tuluk ram, Wuhan khuapi in aa thok mi Covid-19 zawtnak hrik a ngei mi minung 126392, zawtnak in a dam than mi minung 68365 le a thi mi minung 4637 an si cang tiah WHO nih 2020 March 12 suimilaam 4:00 pm ah a langhter.
Photo/Khonumtung Media
