COVID-19 zawtnak ruang ah Hakha City Bus cu March 26 thok in zawtnak hrirai a kian hlan lo caan rikhiah um loin an ngol, tiah kan theih.
Hi kong he pehtlai in HBA Youth Secretary le Hakha City Bus Committee Secretary Pastor Van Tling Thang nih, “Atulio kan vawleipi le kan Chinram chung zong ah kan buaipi mi le kan laupi mi COVID-19 zawtnak ruang ah Hakha Bus City Bus Committee zong nih tonnak kan ngei ve. Cozah lei siseh, Biaknak lei siseh, mibu in thutdir le kalum lo ding in ca an thanh ca ah Hakha City Bus Committee nih meeting biachahnak kan ngei mi cu, 2020 March 26 thok in City Bus kal ti lo ding, tiah kan ti. A ruang cu thaal a si cang ca ah, City Bus hi aa cit mi an tam. Bus khua chung ah ni khat voi nga aa chawh tik ah, bus cung in a tum kai le a kal um an tam ca ah a si. Cozah nih zawtnak a thiang cang an ti hlan chung poh City Bus hi kal lo ding le hlan zong ah kal lo ding, tiah bia kan chah,” tiah The Hakha Post ah a chim.
“Cucaah, Hakha City Bus a dawtu vialte le aa cittu vialte nulepa hna zong nih hi karlak hi cu nan kan ruahthiam naklai kan i nawl hna. Ralring tein thutdir le umkal hi a tha bik mi a si ko ca ah aho poh nih zulh khawh i zuam hna usih. Hi kong kanmah lei zong fakpi in khua kan ruah ve ko. Midang ca ah mi bawmh rian a tuan mi kan si, tiah kan i ruah ve ko nain, ngandamnak lei kong he aa pehtlai mi a si ca ah i ralrin zong cu a herh ve mi a si ca ah kan ngol mi a si,” tiah a cunglei tuanvo ngeitu upa nih The Hakha Post ah a chimchap.
Hakha City Bus hi motor pahnih a si i, CBCUSA bawmhnak in tawlrel mi a si. 2016 thok in caan hman tein Hakha khua chung ah aa chawk mi Bus a si, tiah kan theih.
