Chin Ramkulh Falam, Surbung tlang ah an tuah cuahmah mi Surbung Vanlawngbual ah lenkai le va zoh ti lo ding in tuanvo ngeitu nih nawl an chuah, tiah Chin Ramkulh Cozah Lamsuul Minister Pu Sui Thio sin in March 28 zaanlei ah kan theih.
COVID-19 zawtnak in i runven khawh nakhnga 2020 March 28 in 2020 April 30 tiang vanlawngbual chung ah umkal lo ding in nawl an chuah tiah kan theih.
“Atu Surbung Vanlawngbual hi Chin Ramkulh chung ah a um hmasa mi a si ca ah mizapi lungthin ah a um ngai ca ah mino siseh, upa si hna seh zoh ruah le len ruah ah a kal mi hi an tam ngai tiah kan theih. Mi lengkai mi an um pah ca ah atu bantuk in nawl kan chuah hi a si. Nawl kan chuah cang ca ah riantuantu lawng a chung ah an um cang lai i lenkai a um ti lai lo,” tiah Chin Ramkulh Cozah Lamsuul le Pehtlaihnak Minister Pu Sui Thio nih The Hakha Post ah a chim.
Surbung Vanlawngbual hi zatuak in 90% an lim cang i a ralai mi May thla chung ah honnak an tuah lai tiah kan theih.
Myanmar ramchung ah COVID-19 zawtnak hrik a ngei mi minung 8 an si cang. Hi zawtnak in kan i runven khawh nakhnga Ramkomh Ngandamnak Zung nih, mibu in tuah mi puai tuah lo ding, a si khawh chung in leng chuah lo ding, pe 3 hlat in thutdir ding in mizapi sin ah theihternak a tuah.
