COVID-19 ralrinnak kong he pehtlai in Thantlang Christian Fellowship (TCF) le Penguk i bawm in Biaknaklei asiah, vawleilei a si zong ah puai le laam phun an kham, tiah March 25 ah kan theih.
Hi kong ah TBC Pastor Rev. Dr. Duh Sang nih, “Kannih TCB Khrihfabu cu Zarhpi zing kan i pum ti lai lo. Loudspeaker in Pastorte nih thawngtha an chim lai i cucu mahle inn cio in ngaih a si lai. Zaan pum tibantuk zong chungkhar pumhnak cio in caan kan hmang lai. Hihi April 31 tiang kan zulh ding mi a si,” tiah The Hakha Post ah a chim.
“Atu hi khuatelei tiang in thawng kan thanh cuahmah hna. Mibu um lo ding, thit-um puai zong tuah lo ding le civui tibantuk pawl zong tuah lo ding tiin nawl kan chuah. Pakhat tete in chim ahcun ri kan khiah mi a tam ngaingai,” tiah Thantlang Penguk Zung in tuanvo ngeitu pakhat nih The Hakha Post ah a chim.
COVID-19 kong he pehtlai in Hakha le Thantlang hrawng cu Biaknaklei asiah, vawleilei a si zong ah puai le pumh tibantuk an kham cio i Bawipa Thawhthan zong tuah lo ding in thawng an thanh cio, tiah kan theih.
