Myanmar ramchung ah COVID-19 zawtnak hmuh mi Case No.150 cu Hakha sii-inn ah chiah mi cu voi hnihnak tiang zawtnak an chek thannak ah a phichuak negative (zawtnak a ngeilo) a si ca ah 2020 May 13 ah sii-inn in a chuak lai i, Facility Quarantine ah an chiah than lai tiah kan theih.
Hi kong he pehtlai in Hakha sii-inn-uk Dr. Mang Biak Kung nih, “Voi hnih tiang zawtnak cheknak ah a phichuak negative a si ca ah sii-inn in chuahter a si lai. Cun, ralrinnak ca ah kan naunute hi Facility Quarantine in kan umter rih lai. Khoika hmun ah dah kan umter lai ti cu a fiang rih lo,” tiah The Hakha Post ah a chim.
Hakha ah Facility Quarantine chiah mi chung in minung pakhat zong a phichuak negative a si tiah kan theih.
