US in a rak tlung mi Myanmar ram ah a pakhatnak bik zawtnak hmuh i sii-inn in a chuak cang mi Tuang Suan Khai Kalay a tlunnak inn ngeitu Pi Cin Khan Man (kum 63) cu May 8 ah sii-inn in a chuak cang, tiah kan theih.
Kalay khuapi ah COVID-19 zawtnak a ngei tiah Ramkomh Ngandamnak le Zaanglek Zung nih a thanh mi minung 6 chung ah Case No. 74 Chin nu pakhat cu 2020 May 8 ah a voi hnihnak a phi chuak Negative a si ca ah sii-inn in an chuahter cang tiah kan theih.
Hi kong he pehtlai in sii-inn in an chuahternak hmun ah a va dongtu Lian Suan Piang nih, “Damnak a hmu than mi Case No.74 nu hi Myanmar ramchung ah a pakhatnak COVID-19 zawtnak a ngei hmasa bik mi Case No.1 a tlunnak inn ngeitu Pi Cin Khan Man a si. Anih hi zawtnak a ngei i Taingyin sii-inn ah an chiah. Cun, amah hi Case No. 1 he lawng si loin Case No. 23 he zong aa naihniam ngai mi an si. Ni 23 a rauh hnu ah atu bantuk in damnak a hmuh than ca ah kanmahlei zong kan i lawm ngaingai. Cun, a zohkhenhtu le a thlopbultu sii-inn lei rian ngei hna zong an i lawm taktak. Sii-inn in a chuak cang nain ralrinnak ah Zarh khat chung Stay at Home (inn ah erhkhumh) in a um rih lai,” tiah The Hakha Post ah a chim.
Voi hnih tiang zawtnak an chek mi kong he pehtlai in Kalay sii-innpi riantuan Dr. Kyaw Zin Min nih, “Damnak a hmu mi Case No. 74 hi 2020 May 4 ah a zawtnak an chek i a phichuak Negative a si. Cun, 2020 May 8 ah zawtnak chek than a si i, a phichuak Negative a si than ca ah atu bantuk in sii-inn in kan chuahternak hi a si,” tiah The Hakha Post ah a chim.
Atu bantuk in Myanmar ram ah a pakhatnak bik ah COVID-19 positive a si mi Tuang Suan Khai cu April 30 ah sii-inn in chuahter a si. Cun, Hakha ah positive hmuh in sii-inn ah chiah mi nu pakhat cu May 8 ah a thi an kuat i zeitik ah aphichuak aa hngalh lai, hngalh a si rih lo, tiah kan theih.
Photo/Lyanboy
