July 4, chun sumilaam 12:25 ah Myanmar- Thailand ramri pawng Karen ramkulh, KNLA brigade 5 hmunhma chung um AA sakhan pakhat cu council ralhraang nih raltuknak vanlawng 2 in bomb an thlak ca ah AA ralkap 6 an thi tiah July 5 ah thawng an thanh.
Cu sakhaan pawng hrawng ah kahdohnak zeihmanh um lo in council ralhraang nih jet vanlawng 2 in an rak kah mi hi kah hramhram in kah mi a si tiah AA chimnak nawlngei tu U Khine Thuka nih Western News ah a chim. Cu lawng siloin sakhaan chung sii-inn, siikhaan le thilthitnak inn hna tel in inn cheukhat zong an rawk. Cu council ralhraang jet vanlawng nih Karen ramkulh lei bomb an thlak khawh in thailand ram chung ah a lut tiah AA nih thawngthanh mi chung ah an telh chih.
A luancia mi 2014 November 14 lio zong ah Kachin ramkulh, Laiza i hon mi KIA Candidate Training sianginn cu ralhraang nih hriamngan in an rak kah ca ah Candidate training kai lio mi 23 an rak thi.
Ref: Khit Thit Media
