Chin National Langue for Democracy (CNLD) party nih 2020 kum thimnak ah Hluttaw Palai cuh a duh mi an auh cang nain NLD party le USDP party nih cun an au rih lo, a fiangfai kho rih lo, tiah an chim.
Chin Ramkulh NLD Chairman le atulio Ramkulh Hluttaw Speaker Pu Zo Bawi nih, “Kannih hi zeitik kan auh lai a fiang rih lo. Amah belte, min cazin a pechung mi le thimnak ah i cuh a duh mi an tam ngai cang. Hihi cu zeitik kan auh lai a fiang rih lo nain a rau pah rih ko lai,” tiah The Hakha Post ah a chim.
“Kannih USDP party hi, i cuh a duh mi an um len ko. Asinain, phungluut tein kan au rih lo i minung zeizat tibantuk cu chim awk a tha rih lo. Min a pe mi zong an um ve ko i kanmah nih kan i zoh pah chung mi minung zong an um ve ko,” tiah Thantlang Peng USDP Chairman Pu Zo Peng nih The Hakha Post ah a chim.
CNLD cu phungluut tein Hluttaw Palai cuh a duh mi an auh cang i April 30 tiang an cohlan hna lai. Soknak form zong mahle Peng CNLD Zung ah laak khawh a si cang. Palai cuh aa tim mi minung 30 renglo an si cang, tiah kan theih.
(By: KB)
