Kalay Peng CNLD party nih, Hakhalay khua ah Mee pek sawm tonpumhnak an tuah i, tonpumhnak caan a dihhlan ah an ngol tiah kan theih.
“CNLD party hi zeiruangahdah nan dirh?” tiah Hakhalay mino president Pu Aung Htun Linn nih biahalnak a tuah hna. An bialehnak cu mino president pa nih aa lungsi deuh lo i “Kan hal mi hna nan ka let lo”a ti than hna.
“Na bia chim ning a hngal ko e!” tiah, Kalay Peng CNLD president nih a leh ca ah Mino president pa cu leeng ah a chuak.”An hal mi hna kha, an hal hna ding a si ko. Ziah cu bantuk cun nan um!, thu uh, zeihmanh chim ti hlah u,” tiah Hakhalay khuabawi nih a ti hna ca ah tonpumhnak cu a dih hlan ah an ngol.
“Hakhalay khuami nih, ra than ko u an kan ti i, caan rem tik ah kal than te ding a si. Hi kong ah, biahaltu le bia lettu kha, an i theihthiam lo ruang ah a si. Zeihmanh buainak a um lo,” tiah, Sagaing Ramthen in aa cuh mi Pu Chan Bik Lian nih, 2020 September 19 ah The Hakha Post ah a chim.
Hi bantuk a cannak hi, Sagaing Ramthen Hluttaw Palai Kalay No. 1. in aa cuh mi Pu Chan Bik Lian le, Kalay Peng CNLD President le a hawile minung pathum nih Kalay Peng Hakhalay khua ah, mee pek sawmnak an kal lio September 11, i thil a chuak mi a si.
