2020 kum thimnak ah Cozah an ser kho lai lo, Chief Minister an tuan kho lai lo, an kan ti ko lai, anmah ruah ning cu a dik mi a si nain a lam a um ve i cucu kan i ruahchan fawn ko, tiah CNLD party Chairman Pu Ngai Sak nih July 9 ah a chim.
Hi kong hi Chin Ramkulh NLD party Chairman le atulio Hluttaw Speaker Pu Zo Bawi nih, “Chief Minister le Cozah an serh khawhnak lam a um lo, ka tinak cu, Chin Ramkulh ah Hluttaw Palai 24 kan um. Ralkap Palai hi minung 6 an si. Tedim le Tonzaang ah CNLD party an um lo. Palai 4 an sung. Phundang cun, Palai 24 chung ah 10 zuk ulaw Palai 14 an taang. Palai 14 chung ah Palai 13 an tlin lawng ah Cozah ser khawh a si. Cucaah, Palai 14 chung ah CNLD nih 13 an tlin khawh nakding lam a um lo. Phundang cun, an milu nih a deih lo ca ah Chief Minister an tuan kho lai lo i Cozah zong an ser kho lai lo ka tinak a si,” tiah July 6, The Hakha Post ah a rak chim bal mi kha atu bantuk in CNLD party Chairman Pu Ngai Sak nih a hun fianter ve hi a si.
“2020 kum thimnak ah hin 2015 kum thimnak lio bantuk in NLD nih Ramkomh huap in fakpi in teinak an hmu ti lai lo. Cozah ser nakding ah Palai 333 leng in teinak hmuh a hau. Asinain 333 cung an kai ti lai lo. Tlangcungmi nih Palai 200 leng in teinak kan hmuh lai ca ah anmah nawl lawng in Cozah an ser kho ti lai lo. An duh zong duhlo zong ah i komh hna usih, an kan ti te lai. Kannih Tlangcungmi zong nih i komh sawhsawh kan duh ve lai lo i Chief Minister tibantuk, Minister, Hluttaw Speaker le Deputy Hluttaw Speaker hmunhma kan hal ve lai i Chief Minister hi kan tuan khawhnak a um ka tinak a si. Cucu, kan i ruahchan mi zong a si fawn,” tiah Pu Ngai Sak nih The Hakha Post ah a chim.
Nihin Chinmi ramkheel lei chimceih a zuam mi hna nih NLD nih maw, CNLD nih dah 2020 kum ah Chief Minister an tlaih i Cozah an ser lai tiin lung buai ngai in an ceih cuahmah mi kong ah tuanvo ngeitu Pu Zo Bawi (NLD) le Pu Ngai Sak (CNLD) nih an hmuhning atu bantuk in an langhter hi a si.
