CNLD le USDP hi tangti party an si ti mi kha Thantlang Peng party zung riantuan tu hna santlaih lo a si: Pu Van Ni
2020 kum Party tling democracy thimnak ah CNLD le USDP party hna cu tangti (Alliance) party an si tiah Thantlang Peng USDP nih a thanh mi kha zung riantuan pawl santlaih lo le tlamtlin lo ruang ah a si, CNLD he tangti kan si lo tiah Thantlang Peng USDP party in Ramkulh No.1 ah aa zuam ding Pu Van Ni sin in kan theih.
Pu Van Ni nih, “A pakhatnak ah kanmah USDP party lei santlaih lo le kan thazaang der ruang bik ah a si ko. Kha ca a chuak mi zong kha chirhchan in an tial mi le an langhter mi a si. Kan hnu party 30 nih thimnak zung ah ton nakding nawl an hal mi cazin ahkhan CNLD zong aa tel ve tik ah kan naule riantuan pawl nih zei tuaktan loin chirhchan in an tuah ca ah kan i palh biknak kha si. CNLD he tangti mi kan si ti mi kong he pehtlai in kanmah USDP lei nih thawng fianter nak zong tuah kan i tim cuahmah,” tiah The Hakha Post ah a chim.
Kan hnu nai ramkheel party 30 nih Thimnak Zung ah i tong kho ding le bia i ruah kho ding in ca kan pek mi kha tangti party si ding le si lo ding pakhat hmanh pehtlaihnak a um lo tiah CNLD lei in Salai Ceu Bik Thawng nih a chim.
“A pakhatnak ah USDP le CNLD hi tangti kan si hirmhrim lo. Hi bantuk in thawng dik lo an tial mi le an langhter mi kong he pehtlai in an party Chairman sin zong ah ca kan kuat lai. A sining lo in thawng an thanh ca ah kanmah lei zong kan thin cu a hang ngai. Kanmah central party lei zong nih cathanh kan chuah cang. Hmunhma kan kianh hna, cun kawilefa kan si tiin an chim lengmang mi zong kha chim ti lo ding in ralrinnak zong kan pek hna. Cun, party 30 ton ding le bia i ruah ding kong ahkhan USDP party an i tel le tel lo zeihmanh kan thei fawn lo. Cun, hihi tangti party i ton le bia i ruah zong a si fawn lo. Hi kan i tonnak aruang bik cu thimnak kong he pehtlai in siseh, vote pek ding kong he pehtlai in le a dangdang kong ah i chimhchawnhnak le bia i ruahnak kan ngeih mi a si ko,” tiah Salai Ceu Bik Thawng nih The Hakha Post ah a chim.
2020 kum Myanmar ram party tling democracy thimnak ah Chin Ramkulh chung USDP party in mee hmun, hmun 36 le CNLD lei in mee hmun hmun 37 ah an i zuam lai tiah thawng kan theih.
