Chin National League for Democracy (CNLD) party Central Executive Committee (CEC) nih July 11 ah Pu Lal Maung Cung le Pu Tum Sang cu party tuanvo ngeitu sinak le party chungtel sinak in an phuah hna i Ceu Bik Thawng phuahpiak ding an hal mi an cohlang lo, tiah min langhter lo mi party Chairman pakhat sin in July 14 ah kan theih.
“Salai Ceu Bik Thawng cu party CEC chungtel a si. Anmah nih phuahnak nawl an ngei lo, a phung zong a si lo. Cun, rian in siseh, party in siseh, kan dinhter cang mi hna nih atu bantuk biatung an dirh mi cu cohlan khawh a si lo i, a phung zong a si lo. Salai Ceu Bik Thawng kan dirpi le kan tanh hleinak a si lo. Khatlei ah Pu Lal Maung Cung le Pu Tum Sang zong cu party ah biatak tein thazaang a chuah mi an si ve ko. Asinain, party nih kan ngeih mi phung an buar ca ah ngolter an si. Cucaah, Salai Ceu Bik Thawng phuahpiak ding in an hal mi cu kan cohlang lo,” tiah min langhter lo mi party Chairman pakhat nih The Hakha Post ah a chim.
CNLD CEC nih cathanh an chuah mi chung ah, “CEC nih Thantlang CNLD tuanvo ngeitu hna nih Hluttaw Palai thimnak kong he pehtlai in zulhphung kan ser mi an zulh lo ca ah kan cohlang lo. Party Chairman Pu Lal Maung Cung le Secretary Pu Tum Sang cu party tuanvo ngeitu sinak in siseh, party chungtel sinak in siseh, kan dinhter hna,” tiah July 11 ah cathanh an rak chuah.
Hi kong ah Thantlang CNLD nih July 13 ah cathanh pakhat an chuah ve. Cu chung ah Salai Ceu Bik Thawng kong an tialchih. Cathanh No. 8; “Ceu Bik Thawng cu Thantlang myone CNLD party member sinak in 13/7/2020 ah kan chuah. Thantlang Peng ah CNLD (miphun) party a hmunh chung Candidate ca ah luhnak nawl kan pe ti lo. CNLD Bahu CEC General Secretary a sinak zong in kan phuahpiak hna seh, tiah cathanh an tial mi caang 8 chung ah aa tel nain phuahpiak ding an hal mi cu CEC an cohlang lo, tiah kan theih
