SAC ralkap bawizik Senior General Min Aung Hlaing nih nihin August 5 zaanlei ah TV in biachimnak a ngei i CNF ruang ah Chinram chung khuapi pawl an rawk, tiah sualphawtnak a tuah.
TNLA le MNDAA nih Shanram, Lashio khua i Nichuah-Chaklei SAC Command Center pi an laak hnu ah Min Aung Hlaing nih a voi khatnak biachimnak a ngeih a si i, cu a biachimnak cun tlangcungmi hriamtlai CNF, KIA, KNU le KNDF hna zong minfang kheh in sual a phawt hna.
Min Aung Hlaing nih, “CNF nih PDF he i bawm in Chinram chung ah raldohnak a tuah. Cu ruang ah cun Falam, Matupi, Lailenpi, Mindat le Thantlang pawl an rawk,” tiah a chim.
Min Aung Hlaing nih bia a chimmi chung ah CNF, KIA, KNU, KNDF, MNDAA, TNLA le AA cu minfangkheh in an kong a chim i Myanmar ram daihnak a hrawktu an si caah faak piin kan doh hna lai, tiah a chim.
Cu lawng si loin a cunglei tlangcungmi hriamtlai hna cu ramdang lei zong nih an bawmh hna, tiah Min Aung Hlaing nih a chim chap.
