SAC ralkap bawizik Min Aung Hlaing nih ramkhel ningcang in Myanmar buainak daihter ding in tlangcungmi hriamtlai hna (EAOs) le PDF pawl sawmnak a tuahmi cu Chin National Front (CNF), Kachin Independent Army (KIA) le Karen National Union (KNU) nih an zumh lonak an langhter.
EAOs le PDFs hna nih hriamnam chiah in ramkhel buaibainak cu ramkhel ningcang in daihter ding in kan in sawm hna, tiah nizaan September 26 ah SAC nih thawng a thanh.
Hi kong he pehtlai hin KIA/KIO Vice Chief of Staff a simi General Gun Maw nih, “Atu bantuk in SAC nih sawmnak a tuahnak aruang cu zei ruang ah dah uknak kan laak timi silhnalnak le innchungkhar cazin laak ding timhtuahnak a ngeihmi kong chimrel a duh caah a si ko,” tiah a chim.
KNU chimnak nawlngei Padoh Saw Taw Nee nih cun, “Zeihmanh a chuahpi lai lo. Kanmah zong kan hna lam a chet. Kannih cu ramkhel tinhmi fiang tein a ngeimi kan si. Cucu Myanmar ralkap hi ramkhelrian ah i thlak lo in mizapi uknak tang ah chiah i, professional ralkap bu si ding in sersiam hi a si. A phnihnak ah, Federal Ramkomh sernak ca ah a herhmi phunghrampi thar suai ding in SAC nih a cohlan a herh. A pathumnak ah, nitin in Myanmar rammi hna cung ah SAC nih tuksum sualnak a tuahmi pawl hi ṭuanvo a laak dih lai,” tiah a chim.
CNF/CNA chimnak nawlngei Salai Htet Ni zong nih, “Atu bantuk in sawmnak an tuahmi hi ramkhelrian ah hi hnu caan saupi an i thlak khawh nakhnga timhtuahnak an ngeih caah a si. SAC nih a tuah tawn lengmangmi zong a si. A simh zong a kan simh cang. Innpa ram hna le vawleicung ram hna i soiselnak chung in a chuah khawh nakhnga lam a kawl bia a si ko,” tiah a chim.
Atu bantuk in SAC nih sawmnak a tuahmi kong he pehtlai in Bamar People’s Liberation Army (BPLA) le NUG kuttang, Myanmar ram thlanglei PDF ralkap bu pakhat a simi Special Operation Force (SOF) zong nih SAC an zumh lonak kong cu People’s Spring thawngzamhnak ah an langhter.
