Chin Ramkulh, Paletwa Peng chung ah umhmun khuar in ral a tu mi Rakhine ralkap AA hriamtlai phu hna cu CNF/A nih Chin Ramkulh chung in chuah ding ah ralrinnak a pek cang hna, tiah CNF/A Chimphuannak Nawlngeitu Pu Htet Nyi sin in kan theih.
Victoria Camp ah an tuah mi Chin National Front a voi 2nak Central Executive Committee Meeting 2020 July 7 in 13 tiang an tuahnak ah atu bantuk in bia an chahnak hi a si.
Zarh khat chung meeting an tuahnak ah a biapi in an ceih mi hi remdaihnak kong, Paletwa Peng le Rakhine Ramkulh ah a um mi Chin IDPs pawl bawmh ding kong le Paletwa ah AA le Cozah ralkap an i kahnak kong zeitindah kan remh lai i, kan chanh lai ti mi kong biaruahnak an tuah.
Hi kahdohnak ruang ah a chuak mi harnak pawl hi Chinmi hna he i bawm in tuan khawh ding le AA hriamtlai phu Chinram chung in chuah ding, ral an tuk ti lo nakhnga biaruahnak zong an tuahchih tiah thawng kan theih.
Hi kong he pehtlai in CNF lei Chimphuannak Nawlngeitu Pu Htet Nyi nih, “Cozah lei nih CNF hi Paletwa Peng loin hmundang nan duhnak poh ah nan um kho an kan ti. Paletwa Peng chung tu ahcun umnak nawl an kan pe lo. Paletwa Peng chung ah hin umnak nawl kan pe hna sehlaw tu bantuk tiang hi cu a phan hrimhrim lai lo tiah ka ruah. Atu cu a buai cang ca ah AA nih umhmun an khuar nakhnga lo a si khawh chung in lam kan kawl ve lai,” tiah The Hakha Post ah a chim.
Paletwa Peng chung ah AA le Cozah ralkap kahdohnak kong he pehtlai in Chin Cable Network Channel nih AA ralkap bawizik Major General Tun Myat Naing interview an tuahnak ah Rakhine ram le Chinram hi ramri a si ca ah ral kan tei nakhnga Chinram chung ah kan rak luhnak hi a si tiah a chim.
Major General Tun Myat Naing nih, “Hi ral kan tuknak hi Rakhine ram chung lawng ah a si kho lo. Chinram chung ah luh kan va duh pek duh lo pek ah thih le thih, nun le nun ti mi a chuah ca ah kan luh ve mi a si. Ral a thawh ahcun a bik in a biapi mi hi teinak a si ko. Teinak hmuh nakding ca ah atu bantuk in Chin Ramkulh chung ah kan rak luh hi a si,” tiah a chim.
CNF Chairman Pu Zing Cung zong nih, AA leikap nih atu bantuk in ralrinnak kan pek mi hna hi an ngaih lo a si ahcun dai tein kan um sawhsawh kho ti lai lo tiah 2020 January 26 ah a rak chim mi kong he pehtlai in Pu Htet Nyi a tanglei bantuk in a chimchap.
“Hi buainak hi hriamnam in maw asiloah ramkheel biaruahnak in maw kan ti lai ti mi hi kan i fiang ve rih lo. Kan ramchung ah an um ti nakhnga lo zeitindah kan tawlrel lai ti mi zong kan i fiang rih lo,” tiah Pu Htet Nyi nih a chim.
2016 kum ah CNF le AA Lutlai hna i tong in Chin Ramkulh chung ah ral thawhter lo ding in an rak hal nain AA nih an cohlan lo ca ah tonnak le biaruahnak zong tuah an tim ti lo tiah kan theih.
Photo/ CNF Facebook Page
