Chin National Front/Army (CNF/A) ca ah hmailei an tangka luhnak le pawcawnnak ca ah thathnemnak a chuahpi mi a si lai, ti ruahchannak he USA in Pu Ngun Tling (Tlangpi) nih ngakhur a cawhpiak hna.
Hi ngakhur cawh mi cu pe 400 a sau, pe 90 a kau i pe 5 a thuk. Cun, Ngakhur tlang ah vok 1,000 tluk zuat ding le motor kal kho ding tiang in cawh timh a si. Cu ngakhur cu cawh hram thawk a si i tawlrel lio a si, tiah kan theih.
“Hi lawng hi a si lo. CNF/A hmailei an tangka luhnak an pawcawmnak ca ah chawlehnak tuah ding tampi timhlamh mi a um rih. CNF/A hi an har tuk, an tangka luhnak a tlawm tuk i harsa tuk in an um mi hi ka lung a tha hrim lo. Rammi nih kan dawt hna ding a si. Kanmah nih kan dawt hna lo ahcun aho miphun dang nih dah an dawt hna lai. Hi ngakhur cawhnak ca ah hin tangka sing 150 ka bawmh hna i rian kan thawk cang,” tiah Pu Ngun Tling nih The Hakha Post ah a chim.
Hi bawmhnak pek mi hi a Phu le a Bu in bawmh mi siloin Pu Ngun Tling pumpak nih bawmhnak pek mi a si, tiah kan theih. Ngakhur cawhnak lawng siloin CNF/A ca ah angki, angki lum, tawhrolh tibantuk hnipuan (Secondhand) tampi zong bawmhnak a pekchih hna. Mizoram secondhand tawlreltu pakhat he zong pehtlaihnak tuah in kuat peng ding in hnatlak zong a si cang, tiah kan theih.
“Hmailei saduhthah mi cu Tio ah hin thil chiahnak inn nganpi i sa sehlaw kan naule nih tangka hmuhnak ca ah nihlawh pek in rian zong tuan hna seh ti ka duh. Har tuk in an um lai i an lung dongh lai kan phang ngai. A ngaingai ti ahcun pumpak nakin a bu bantuk in dir i bawmhnak pek hi ka timh deuh mi a si,” tiah Pu Ngun Tling nih a chimchap.
Ngakhur ah zuat mi nga pawl cu hmun dang ka dang ah chawlehnak pakhat in zuar i CNF/A ca ah tangka luut siam ding hi timh bik mi a si. Nihin tiang ah CNF/A nih a biapi in bawmhnak an hmuhnak cu Chinland Club nih bawmhnak pek mi a si, tiah kan theih. ###
