Chin National Front/Army (CNF/A) ralkap le an chungkhar hna COVID-19 raikham sii COVISHEILD chunh ding le chunh lo ding Cozah lei nih nawl a chuah mi a um rih lo, Cozah lei nawlpeknak kan hngak tiah Chin Ramkulh Ngandamnak Zung Lutlai Dr. Aung Ngwe San sin in thawng kan theih.
“CNF/A caah COVID-19 raikham sii chunh ding le chunh lo ding hi kanmah lei nih zeihmanh kan thei rih lo. Cun, kanmah Ngandamnak Zung lei nih kanmah duh in tuah awk a tha mi a si fawn lo. Cunglei nih nawl an kan pek ning poh in a si te lai,” tiah Dr. Aung Ngwe San nih The Hakha Post ah a chim.
Myanmar ram chung ah COVID-19 raikham sii hi 2021 January 27 in Ngandamnak Zung le sii-inn riantuan pawl chunh hram an rak thok. Myanmar ram huap in atu a ra lai ding February 5 ah chunh hram thok a si lai tiah Ramkomh Ngandamnak Zung nih a rak thanh bal.
Chin Ramkulh Cozah chimphuannak nawlngeitu Sipin Minister Pu Soe Htet nih, “Atu COVID-19 raikham sii hi ruah lo piin a chuak mi a si. Asinain, CNF/A zong hi rammi an si ca ah chunh cu an si ve hrimhrim ko lai. Kannih Chinram hi cu sii kan tinco mi a tlawm tuk rih. Cawk mi le laksawng ngah mi hi 3 Million le a cheu lawng a si. A cawk zong cawkchap ding a si rih. Hriamtlai hna zong raikham sii an i chunh khawh ve nakding kan ruahpiak ko hna lai,” tiah 2021 January 29 ah a rak chim bal.
Chin Ramkulh chung ah COVID-19 raikham sii chunh hi January 27 in chaklei laitlang chung ah an chunh. Thlanglei Laitlang ca ah sii a phak khawh lo ca ah an nih lei cu 2021 January 28 ah an i chun. Cun, Paletwa lei hi cu nizaan naite lawng ah an i chun kho ve.
Cun, CNF/A camp lei chimphuannak nawlngeitu Salai Tet Nyi nih, “Cozah lei nih CNF hriamtlai pawl zeitik ah dah sii an kan chunh lai ti kan thei rih lo. Sii chunh ding kong zei thawngpang taktak hmanh kan thei rih lo. Atu camp ahhin COVID-19 committee zong an um ve i, Mizoram in a rak lut mi poh Quarantine ah chiah an si ve. COVID-19 raikham sii hi mizapi siseh, Cozah siseh kan dihlak in kan i chunh awk cu a si ko. Kan covo cio a si ko,” tiah a chim.
