Chin miphun dohthlengtu hriamtlai bu pakhat a si mi Chin National Defense Force (CNDF) he raldohnak lei ah ṭan ṭi ding in timhtuahnak kan ngei tiah Burma People Liberation Army (BPLA) haotu Ko Saung Kha nih a chim.
Chin Brotherhood (CB) Operation ca ah online in fund kawlnak an tuah mi biaruahnak ah Ko Saung Kha nih atu bantuk hin a chim hi a si.
Ko Suang Kha nih, “CNDF he voi tampi bia kan i ruah. Hmun khat ah raldo ding in timhtuahnak zong kan ngei. Kawlmi cu Kawlmi umnak lawng ah raldoh ding ti mi ruahnak hi kan ngei lo. Khawzei hmun poh ah ral kan doh zong ah kan doh mi ral hi SAC an si kha abiapi. SAC ralkap ahram chah ding ti mi policy hi kan i tlaih mi a si,” tiah a chim.
2025 chung ah Chinram, Magwe ramṭhen le Sagaing ramṭhen ah hin kahdohnak biatak deuh in kalpi a si lai tiah PBLA nih a zumh i, cu caah cun atu te in timhtuahnak zong kan ngei len cang tiah a chim chap.
CB he zong hmun khat ah raldoh ṭi ding le hmailei ah bu khat le bu khat karlak pehtlaihnak fek chinchin ser ding in timhtuahnak kan ngei, tiah Ko Saung Kha nih a chim.
