CNA nih an rak tlaih mi hna Yaw Defense Force (YDF) ralkap pahnih cu nihin July 12 ah an thlah ṭhan cang hna, tiah theih a si.
Hi kong he pehtlai in CNF/CNA chimnak nawlngei Salai Htet Ni nih, “An hruaitu hna he tonnak kan ngeih hnu ah kan thlah ṭhan cang hna,” tiah media ah a chim.
YDF lei ṭuanvo ngeitu pakhat zong nih, “Kan ralkap pahnih cu nihin ah an luat cang i pehtlaihnak zong kan ngei kho cang. Thil sining dikthliar tu cu kan theifiang ve rih lo,” tiah a chim.
Magwe ramṭhen, Gangaw peng ah hram a bunh i, AA le Chin Brotherhood he ral a do mi YDF ralkap pahnih Ko Ok Thein le Ko Aung Thet Khine cu July 7 ah khan Matupi peng, Zawngnak khua ah CNA nih an tlaih hna.
“Bia hal awk kan ngeih hna caah kan kalpi chungmi hna a si. An hruaitu hna he biaruahnak kan ngei ta lai i a tlamtling ko lai,” tiah YDF ralkap pahnih an tlaih mi hna kong he pehtlai in Salai Htet Ni nih a rak chim.
CNA nih YDF ralkap pahnih an thlaih hna caah Gangaw-Hakha lam cu July 8 thawk in YDF nih an khar caah Laitlang lei a kai ding mi mawtaw 70 hrawng an i hreng, tiah theih a si.
