CNA ralkap pawl nih Yaw Defense Force ralkap pahnih an tlaih hna ruang ah Gangaw in Chinram lei a kai ding mi mawtaw pawl cu YDF nih lam an kham hna, tiah Yaw Alintan nih a ṭial.
YDF ṭuanvo ngeitu pakhat nih, “Kan ralkap pahnih tlaih an ton caah runvennak kong he pehtlai in lam kan phih chung bia a si. Khulrang in lam kan on khawh nakhnga kan tawlrel cuahmah ko. Lamphih ruang ah aa hrengmi khualtlawng pawl eidin tirawl zong kan ralkap pawl nih a ṭha bik in an tawlrelpiak ko hna lai,” tiah a chim.
Magwe ramṭhen, Gangaw peng ah hram a bunh i, AA le Chin Brotherhood he ral a do mi YDF ralkap pahnih Ko Ok Thein le Ko Aung Thet Khine cu July 7 ah khan Matupi peng, Zawngnak khua ah CNA nih an tlaih hna.
Hi kong he pehtlai hin CNF/CNA chimnak nawlngei Salai Htet Ni nih, “Bia hal awk kan ngeih hna caah kan kalpi chungmi hna a si. An hruaitu hna he biaruahnak kan ngei ta lai i a tlamtling ko lai,” tiah a chim.
CNA nih YDF ralkap pahnih an tlaih mi kong he pehtlai in YDF nih, “CNA nih aruang um lo in kan ralkap pahnih an tlaih mi hna hi a rianrannak in an thlah hna a herh,” tiah July 9 ah ca an chuah.
