Magwe ramṭhen, Gangaw peng ah hram a bunh i, AA le Chin Brotherhood (AA/CB) he ral a do mi Yaw Defense Force (YDF) ralkap pahnih cu July 7 ah CNA nih an tlaih hna, tiah theih a si.
July 7 zaanlei ah Gangaw peng le Matupi peng ramri, Zawngnak khua ah a um mi YDF ralkap pahnih cu CNA ralkap pawl nih an tlaih hna, tiah Yaw Alinṭan ṭuanvo ngeitu nih a chim.
“CNF/CNA he hin zei bantuk buaibainak hmanh kan ngei ballo. CNF/CNA lei kan pehtlaih khawh hna lo caah zei ruang ah dah an tlaih hna ti mi kan thei rih lo,” tiah Kachinwaves thawngzamhnak ah a chim.
“Atu July thla chung thotho ah Yaw hmunram i PDF Gate pakhat ah CNA ralkap 18 an rak ra i, YDF nan si maw tiah an hal hna. PDF an si ti mi an theih ṭhan caah bia ṭha te in an i ruah i an kir ṭhan,” tiah a chim chap.
Matupi khua laaknak kong he pehtlai in CB nih June 29 ah thawngthanhnak an chuah mi ah YDF le Yaw Army hi AA/CB he Matupi ah ral kan do ṭi, tiah an langhter.
