SAC nih Thantlang, Lungler le Tlangpi ah raltuknak vanlawng in bomb a thlak
SAC ralhraang pawl nih fekthup in hmunhma an laknak Thantlang Palek Sakhan cu Chin miphun ralkap CNA le CDF komh nih zahan February 8 zaan suimilaam 10:00 in zinglei 1:00 tiang an kah hnu ah an laak khawh; drone kahnak tel in hriamnam zun 40 leng le kuanzen tampi zong an laakchih khawh tiah theih a si.
Hi kahdohnak ah meithal zun 40, 60mm hriamnam ngan zun khat, Drone kahnak pakhat, bomb thei pawl, motor cycle pahnih, zenthong tampi le raal hriamnam tampi an laak khawh tiah kan theih. Ralhraang pali an thi tiah theih a si nain Chin ralkap lei nih phung ning in thanhnak an tuah rih lo ca ah kan fehter kho rih lo.
Chin ralkap pawl nih Thantlang Palek Sakhan an kah hnu in SAC ralhraang lei nih vanlawng hmang in kahdohnak a tuah. Thantlang khua lawng si lo in nihin zinglei ah Thantlang peng Lungler khua ralhraang sakhan hlun le Tlangpi khualu zong ah bomb a thlak tiah kan theih. Hi bomb a thlakmi ruang ah khuami a thi mi le hmapu an um hraw lo tiah theih a si nain kan fehter kho rih lo.
“Thisen tampi luan hnu ah kan ram ai thlen ding a si ahcun ka thisen luang ve cang ko seh” (Lt. Khut Hlei Thang, CNA)
Thantlang Palek Sakhan laak kahdohnak ah CNA in Lt. Khup Hlei Thang nih ram le miphun ca ah a nunnak a pek. Tu tan ram ca a nunnak a pe mi Lieutenant Kap Hlei Thang cu ram a dawtu pasal tha pakhat a si i, a nun lio ah a facebook in “Thisen tampi luan hnu ah kan ram ai thlen ding a si ahcun ka thisen luang ve cang ko seh,” tiah a rak tial.
