Sagaing Ramthen Chin Affairs Minister hlun Pu No Than Kap nih, “Chief Minister Salai Lian Luai nih ka riantuan mi a hngalh dih lo ca ah ka chim ve lai,” tiah September 21 ah a chim.
Hi kong hi Chin Ramkulh Cozah Chief Minister Salai Lian Luai nih September 18 (The Hakha Post September 19 chuak) ah a rak chim mi a si. “Keimah le Pu No Than Kap hi aa zuam ding mi kan si. Pu No Than Kap cu nan hngalh cio bang, CAM a tuan lio ah zeihmanh a tuan lo zong kha nan hngalh ko lai. Cucaah, Pu No Than Kap hi ka tei lai i kanmah party nih teinak kan hmuh thiamthiam fawn lai,” tiah a rak chim.
Hi kong ah CNLD Chairman Pu No Than Kap nih, “Pumpak in ka ti ca ah ka chim ve lai. Asinain, kannih CNLD cu minung pumpak thangchiat riangmang in ram kan kheel lo i teinak hmuh kan i tim lo. CAM ka tuan lio ah Kawlrawn, Kalay, Tamu, Humalin, Khantim Kukki in Gangaw tiang Chinmi ca ah rian ka tuan mi khi a hmu hnga lo maw? Tam tuk ka chim ahcun a sau lai. A tawinak in chim ahcun ka riantuan mi a hngalh tung lo ahcun tam tuk in rak chim hlah seh. Cu nakin, amah Chief Minister a tuan caan chung ah zeiruang ah dah Chin Ramkulh hi Ramkulh le Ramthen dihlak nakin ziknawh le eihmuar a san bik, ti hmanh hi ruah deuh awk a si. Cun, ka chim rih lai. Tutan thimnak zong ah a ka tei lai lo. A ngaingai cu, teinak cu Pathian le mizapi kut ah a um ko. Asinain, Pu Lian Luai nih cun a ka tei bal lai lo,” tiah Pu No Than Kap nih The Hakha Post ah a chim.
Kannih CNLD cu mi thangchiat in meepek sawm kan i tim lo i thianghlim tein teinak hmuh zong kan i tim, ti zong a cunglei upa nih a chim fawn. Pu No Than Kap cu le atulio Chin Ramkulh Chief Minister Salai Luai hi Falam Pyine meehmun No. 2 ah aa cuh ding mi an si.
