Kanpetlet peng, Cindwe khuachung i sang vialte cu CDF kut cung ah a um cang, tiah nizan February 28 SAC ralkap dirkamhtu People Media nih a ṭial.
Nizaan zinglei sml. 8:20 hrawng ah Cindwe SAC palik Gate (1) cu CDF nih an rak kah i Pyituhsit a si mi U Mawng Tin cu sniper meithal in a lu ah an khen caah a thi, tiah a langhter.
Cindwe khuachung i sang pali cu CDF kut cung ah a um dih cang i SAC ralkap le an chungkhar pawl an umnak palik sakhaan le sianginn lawng an taang cang.
Cindwe i SAC ralkap chungtel pakhat nih, “Nihin zinglei ah an rak tuk. Kanmah lei in Pyituhsit pakhat a nunnak a liam. Sianginn le palik sakhaan hi aa naih te ah a um mi an si. Mah hlan ah khan cun mi umnak sang le palik sakhaan karlak ah hin Gate pakhat a rak um. Asinain, mah Gate cu kan chuahtak cang. Atu hi ralkap le pyituhsit he fonh ah cun thazaang 130 hrawng kan si. Hliam a pu mi 23 kan um,” tiah Februray 28 zaanlei ah a chim.
Cindwe khuachung le kiangkap vialte cu CDF nih hmunhma an laak dih cang caah palik sakhaan le sianginn ah aa hreng mi SAC ralkap, ralkap chungkhar le Non-CDM minung 379 cu eidin tirawl lei ah harnak an tong ngai cang tiah a chim chap.
“Facang kan i phomh chom i kan ei. Ralkap zong facang ei awk an ngei ti lo. Dinti zong a um ti lo. Tilu hna in rawl kan chuang. Sii-ai zong a dih viar cang,” tiah Cindwe khuami pakhat nih a chim ve.
Cindwe khua cu CDF-Kanpetlet nih December 2023 thawk khan doh hram an rak thawk i atu ah cun ni 70 deng a rau cang.
