Kanpetlet peng, Cinduai khua ca ah eidin a rak chan mi SAC ralkap motor tlar cu Saw peng, Yinke khuate an phan i inn an khangh hna tiah tualchung mi hna sin in kan theih.
SAC motor tlar cu tank pakhat, JCB pakhat tel in motor 30 hrawng an si i, nizan ah khan Saw peng, Innbu khua an phan. Nihin chun suimilaam 11:30 hrawng ah Yinke khua mei in an khangh tiah kan theih.
SAC motor tlar ah ralkap 300 hrawng an i tel i tualchung rammi ralkap hna he faakpi in an i kap, SAC lei nih hriam ngan an kah mi ruang ah Yinke khua inn pawl an kaang tiah tualchung mi nih an chim.
Yinke khua cu inn 200 leng an si i SAC lei nih hriam ngan an kah ruang le an khangh ruang ah khuapi ti awk in a ciam cang tiah an chim.
“Khuapi in a kaang cang tiah kan theih ning a si. A dikthlir cun kan thei kho rih lo,” tiah khuami pakhat nih a chim.
Atu ah Kanpetlet peng Bawngbin khuate ah ralzaam pawl an i dor i rianrang in bawmh an herh tiah tualchung mi nih an chim.
