Chuncung khua chung ah umhmun a khuar mi SAC ralhraang pawl cu CNA le CDF nih nizan April 30 ah an kah hna i SAC lei a thi mi an tam pin ah hriamnam zeimaw zat zong an laak khawh tiah theih a si.
Cu kahdohnak ah cun CNA in Lance Coporal Bah Aye nih ram le miphun ca ah a nunnak a pek i pahnih hma an pu tiah thawng kan theih.
SAC lei in a thi mi le hma pu an tam tiah theih a si nain zeizat set dah an thi ti mi tu cu Chin ralkap lei nih phung ning in thanhnak a um rih lo.
March thla thawk ka ah Kalay lei in a rak kai mi ralhraang phu chung in a taang mi pawl le Hakha lei in ralkap thazaang an rak chap mi SAC ralhraang pawl cu Chuncung khua ah umhmun an khuar. Cu ralhraang phu le Chin ralkap hna kar kahdohnak ah SAC pawl an fah ca ah SAC lei in a thi mi le hma pu an tam tiah kan theih.
Nizan zanlei suimilaam 3:30 hrawng zong ah SAC nih a ralhraang pawl vanlawng in a rak bawmh hna i Chuncung khua pawng ah bomb voi ruk a thlak tiah kan theih.
