Chin Human Rights Organization (CHRO) hruainak in Chinram Pengkip ah a lak tein kutzungthiam cawnnak centre an tuah lai, tiah tuanvo ngeitu sin in July 8 ah kan theih.
Hi training centre ah cawn khawh ding mi pawl hi a tlangpi in lehtama, payan, thilthit, electric mei remh cawnnak, motor mawngh cawnnak tibantuk an si. Sianginn a kai kho ve lo mi le kuli hlawhchom in paw aa cawm mi hna ca ah papek in tuah timh mi a si, tiah kan theih.
“Hi kong he pehtlai in Dawei ah hlathlainak zong kan va tuah cang. Annih hi National Security Standard Authority (NSSA) nih a cohlan mi asiloah a theihpi mi an si. Cu hlan ahcun Yangon ah kal in camipuai bantuk in phit a si. Hi NSSA in a awng mi cu lethmat an pek hna i Asia ram pumpi ah riantuan khawhnak nawl an ngei. Cucu, kanmah Chinram zong ah hin tuah kho ve usih law ti hi saduh kan thah liopi a si,” tiah CHRO Project Manager Salai Van Biak Thang nih The Hakha Post ah a chim.
Hi kong he pehtlai in Salai Van Biak Thang nih a chimchap mi cu, “Kannih Chinram ahcun a cawnnak hmun zong a um lo. Thilri a herh mi zong a tling lo. Tahchunhnak ah motor mawngh cawn duh ahcun Kalaymyo ah cawn a hau. Tedim le Tonzang hrawng zong minung 300 hrawng Kalaymyo ah an cawng. Hihi kanmah Chinram Pengkip ah tuah kho ve ding in kan i tim cuahmah,” tiah a chim.
Hi Training Centre hi CHRO tang ah a um mi Twelett riantuannak tang ah a um lai. NSSA cohlan mi a si khawh ahcun rian an cawn hnu ah Laica tein camipuai an phi lai. An awn ahcun Asia ram pumpi ah riantuan khawhnak nawl an ngei lai. Cawn man a um lai lo. Khuapi in siseh, khuate in siseh, a duh mi poh kai khawh a si lai. A nicaan le zeitik in thawk ding belte a fiang rih lo, tiah kan theih.###
