Khrihfa mi hna nih kan sunhsak mi Christmas le Kumthar cu minung 50 cung lonh loin biakinn chung ah pumhkhawmh khawh ding in Ramkomh COVID-19 runvennak phu nih 2020 November 19 i meeting an tuahnak ah biachahnak an ngei tiah kan theih.
Hi an meeting biakhiah mi chung ah COVID-19 zawtnak hi khuasik ah a karh kho mi zawtnak a si ca ah November 21 in December 5 tiang innchung ah i erhkhumh ding in Ramkomh Ngandamnak le Zaanglek Zung nih mizapi sin ah forhfialnak ca an tial.
Christmas le Kumthar tuah ding kong he pehtlai in Chin Ramkulh Social Minister Pu Pau Lun Min Thang nih, “Christmas le kumthar tuah ding hi nawl cu kan pek te ko lai. Asinain, Ngandamnak zung nih nawl an chuah mi ning tein zulh le tuah a hau lai. Ramkomh Ngandamnak Zung lei zong nih minung 50 tiang um ding cun nawl a chuah ko i, Ramkulh le Ramthen Cozah lei zong nih hi ning hin kan tuah te ko lai,” tiah The Hakha Post ah a chim.
Thimnak a dih i, teinak an lawmh hnu in COVID-19 zawtnak a karh. A liamcia zarh chung kha cu COVID-19 zawtnak a vun zor ngai nain, tu zarh chung cu zawtnak a karh ning a tam. Ni khat ah zawtnak hi minung 1600 fai zong hmuh a si cang.
Budish pawl i thla khat voi li an tuah tawn mi rawlulh thlacam zong an onh hna nain, minung 30 leeng kai lo ding in nawl an chuahpiak hna lai tiah theih a si.
