Chinmi kan hmelchunhnak pakhat a si mi Chokhlei kung hau lo ding le a nge khiah lo ding in 2020 February 24 Tedim motor lampi ah Fort White Chokhlei timi phu nih Stricker benhnak in mizapi sin ah cawlcanghnak an tuah tiah kan theih.
Hi kong he pehtlai in Fort White Chokhlei phu i chungtel pakhat nih, “Khualtlawng, chukcho a vakvai mi hna nih lam kam i a par mi lawng si loin Chokhlei kung an hmuh mi poh an khiah, a par an lawh. Micheukhat ve nih cun a ngiang khiah lawng si loin a kung tiang in an hau. Chokhlei hi kan phun zong ah fawi tein a nung mi a si lo leng ah fawi tein a karh mi a si lo. Atu ning tein chokhlei kung kan hau, a nge kan khiah a si cun a ci kan mihter sual lai ti kan phan ca ah atu bantuk in kan cawlcanghnak a si,” tiah The Hakha Post ah phone he pehtlaihnak in a chim.
Atu bantuk in Canedy tlang i chokhlei kung an hau, a nge an khiah tuk ca ah Chokhlei kung hi a tlawm chin thluahmah cang. Cozah lei nih chokhlei he pehtlai in tha tein tan kan lakpiak ve hna seh ti hi saduh kan that tiah khuami pakhat nih a chim.
photo/ internet
