Rakhine hriamlai AA nih a laakmi Chinram, Paletwa peng ah Rakhinemi tampi hmunhma an khuar thluahmah, tiah Paletwa tualchungmi hna nih an chim.
Paletwa ah AA le SAC ralkap karlak kahdohnak a chuah thawk in Paletwa peng khuasa Chinmi tampi an rak zaam i, Paletwa ah SAC ralkap an um ti lo hnu zong ah Paletwa in Chinmi pawl pehtlai in an zaam, tiah tualchungmi pakhat nih a chim.
Paletwa ralzaam pakhat nih, “Kannih hi ral a thawh ka khan a zaammi kan si caah khika lei khin zei ngaingai dah a cang timi fiang in kan thei kho lo. Eidin tirawl le sii-ai a har i atu tiang zong hi Paletwa in a rak zaammi an um peng ko,” tiah Chin World ah a chim.
Kahdohnak ruang ah SAC ralkap nih Rakhine lei ah eidin tirawl luhter lo ding in lam an phih caah Rakhine chaklei in mi tampi cu Paletwa ah an rak i ṭhial hna, tiah khuami pakhat nih a chim.
Paletwa peng chung i SAC ralkap sakhaan pawl cu AA nih an rak laak dih i, atu ah cun ukhruainak lei zong AA nih an tlaih dih cang tiah theih a si.
