Chinram chung kahdohnak ruang ah Mizoram lei ah a zaammi SAC ralkap 300 leng an phan cang, tiah theih a si.
November 2023 in 2024 January thlathawh tiang, thla 2 chung ah India ram, Mizoram chung ah SAC ralkap 300 leng an zaam hi a si.
November 13 ah CNA le ṭangrual mipi ralkap bu hna nih Falam peng, Rihkhawhdar khua an lak i, SAC ralkap 40 leng Mizoram lei ah an rak zaam.
November 16 ah Falam peng Tibual SAC ralkap sakhaan in ralkap 30 hrawng Mizoram ah an rak zaam ṭhan.
CNA le ṭangrual mipi ralkap bu nih an lakmi Matupi peng, Lailenpi SAC ralkap sakhaan zong in ralkap 30 hrawng Mizoram ah an rak zaam.
Paletwa peng chung ah AA le MDF-Mara nih an lakmi Point (377) in SAC ralkap 150 hrawng le Shinletwah SAC ralkap sakhaan in ralkap 100 leng zong Mizoram ah an zaam hna.
Mizoram ah a zaammi SAC ralkap pawl cu India cozah le SAC ralkap tawlrelnak in Myanmar ram lei ah an rak kuat ṭhan lengmang hna, tiah thawng kan theih.
