Chief Minsiter Pu Pa Thang hruaimi Chinram Cozah le Zo Reunification Organization (ZORO) cu atulio Chin miphun kong he pehtlai in nizaan August 5 zinglei ah Mizoram, Aizawl khua ah tonnak an ngei, tiah kan theih.
Chinram Cozah le Chin Brotherhood karlak ruahnak i dan ruang ah kahdohnak tiang a chuah mi hi ZORO nih cun kan duh lo ngai tiah an langhter i kannih cu unau lawngte kan si hna caah i rualrem tein rian kan ṭuan ṭi awk a si, tiah ZORO nih an lungput an langhter.
“Kannih cu unau kan si, i ṭhen awk kan ṭha lo. Pakhat le pakhat kar ah kahdohnak a um awk zong a si lo timi hi biapi ngai in kan ruah a hau. Thawhkehnak hrihhram khat unau kan si caah Pathian nih ni khatkhat ah cun a kan font ṭhan te lai tiah ka zumh. Cucahcun unau karlak ah i kahdohnak tiang a ummi hi a ṭha lo i kan i rem a herh,” tiah ZORO Chairman Pu R. Sangkawia nih a chim.
Chin miphun kongkau ah ZORO nih atu bantuk in tonnak a tuahmi cung ah Chinram Cozah nih an lunglawmhnak an langhter i Chinram Cozah nih cun Chin miphun unau karlak buaibainak hi cabuai cung biaruahnak te in daihter an duh zungzalnak kong le Chin miphun unau vialte he dairem tein khuasak ṭi an duhnak kong an langhter.
Atutan ton biaruahnak ah Chinram Cozah lei in Chief Minister Pu Pa thang, Ramleng Vuanci Dr. Sui Khar le ZORO lei in Chairman, Secretry le ṭuanvo ngeitu upa hna an i tel kho.
ZORO cu Mirang cozah nih a ṭhenmi ramri ruang ah India, Myanmar le Bangladesh ah khua a sami Chin miphun vialte uknak pakhat tang ah kan um ṭhan khawh nakhnga a cawlcang cuahmahmi Mizoram chung i bu pakhat a si.
Kanhnu July 27 zong ah khan ZORO tawlrelnak in CNF/CNA le ZRO/ZRA karlak a voi khatnak bik ton biaruahnak an rak ngei, tiah theih a si.
