Khuacaan kong hi ruahdamh lawng in chim khawh a si lo nain Chin Ramkulh ah siseh, Myanmar ramchung hmun zeimawzat ah ruahpi a fak kho, tiah Chin Ramkulh Nikhuah Tahnak Zung Lutlai Pu Khup Khan Cin nih September 21 ah a chim.
Myanmar ram Nikhua Tahnak Zung (Department of Meteorology and Hydrology) nih September 21 zinglei suimilaam 7:00 tiang nikhua umtuning a thanh ning ah, Bay of Bengal rili hi Nichuah Chaklei in aa thok i thli a hraang mi kha Bengal rili Nitlaklei ah a phan i atu hi a hraang cuahmah. Cucaah, Andaman Sea rili le Bay of Bengal rili ah thli a thazaang a thawn tuknak hi a si.
“Fuurpi zong a si. Cun, Chin Ramkulh ah ruahpi a suur ning hi zatuak lehmah 3 ah kan ruah. Peng kip tu ahcun zatuak lehmah 1 a si ko. Zeiti a si hmanh ah khuacaan kong cu a dikfel in chim khawh a si lo nain ruahpi cu aa peh rih kho mi a si ko,” tiah Pu Khup Khan Cin nih a chimchap.
Myanmar ram Nikhua Tahnak Zung (Department of Meteorology and Hydrology) nih hi hnu ni 2 chung nikhua a chimchung ning ah, “Sagaing Ramthen Chaklei, Kachin Ramkulh, Chin Ramkulh le Rakhine Ramkulh ah hin atu nakin ruahpi a faak deuh kho,” tiah September 21, zinglei suimilaam 7:00 ah a thanh.
