Myanmar National League 2 pumpululh chuihnak ah aa zuam ve mi Chinland FC pumpululh team nih Chinland For Paletwa min bunh in Paletwa peng chung a ummi ralzaam hna ca ah a voi 4nak bawmhnak cu 2020 November 23 zinglei sang ah an pek hna tiah theih a si.
Bawmhnak pek mi kong he pehtlai in Chinland FC ngeitu Rev. NC Thawng Tha Thang nih, “Ralzaam sin ah bawmhnak kan pek hi atu hi a voi 4nak a si. Tutan hi chungkhar 100 sin ah Ks. 50,000 in pek an si. Tangka fang in bawmhchanh khawh mi dihlak hi sing 50 a si. Chinland For Paletwa Program chung ah a kan telpitu ramchung ramleng um nan dihlak cung ah kan i lawm,” tiah The Hakha Post ah a chim.
Paletwa Peng chung ahhin kahdohnak ruang ah inn le lo chuah taak in a zaam mi ralzaam dihlak minung thonghra leeng an um rih. Khuasik a phak ca ah angki lum le zaanvurh puan ah harnak an tong tiah theih a si.
Cun, Chinland For Paletwa zong nih pehzulh in bawmhnak pek ding zongin timhlamhnak an ngei tiah kan theih.
