Chinland FC in CEO Pu Naing Hung le tuanvo ngeitu hna nih, “Chinland for Tedim,” ti mi tlangtaar in COVID-19 dohnak le runvennak he pehtlai in Tedim sii-inn ah tangka sing 30 man thilri April 27 ah bawmhnak an pek hna, tiah kan theih.
Hi bawmhnak hi Personal Protection Equipment (PPE) zuun 30, mask 4000, khairiat kuthruk 1000, kut tawlnak spirit litre pakhat aa tel mi dur 100, Chinland FC uniform 30, le blanket puan a ngan mi zuun 30, a si, tiah kan theih.
“Hi bawmhnak hi kan tikhawhtawkte a si ko. CEO le tuanvo ngeitu hna an va kal i hi bawmhnak hi an va pek hna. COVID-19 dohnak kong ah hmaisuang in rian a tuan mi hna Ngandamnak Zung riantuantu hna le a lamkip in bawmchantu hna conglawmhnak le upat peknak can ah kan i tel ve mi a si. Pathian nih Myanmar ram thluachuah pe chin sehlaw, kan ram a ngandam ko seh, ti hi kan thlacamnak a si,” tiah Chinland FC President le Myanmar Football Federation (MFF) Council member a si mi Saya TT nih The Hakha Post ah a chim.
Chinland FC nih Tedim sii-inn bawmhnak lawng si loin atulio AA hriamtlai le Cozah kahdohnak ruang ah hartong le ralzaam in a um mi Paletwa kan unau hna zong a rauhhlan ah bawmhnak pek an i tim, tiah kan theih. Paletwa ralzaam bawmh nakding ah Chinland FC thazaang petu vialte, pumpululh celh a zuam mi vialte, tikhawhtawk cio in i tel ding ah sawm nan si, ti zong a cunglei tuanvo ngeitu nih a chim fawn.
Photo: Chinland FC
