Thantlang khua ah abiapi bikmi SAC ralkap sakhaanpi cu nihin August 5 zinglei ah Chinland Cozah ralkap hna nih tlamtling tein an laak khawh cang, tiah thawng kan theih.
Thantlang khualu lei ah a ummi Kha-La-Ya 269 SAC ralkap sakhaanpi cu nihin zinglei sml. 9:00 fai ah Chinland Cozah ralkap nih an laak khawh hi a si.
CNF/CNA chimnak nawlngei Salai Htet Ni nih, “SAC ralkap sakhaan cu kan laak cang. Khuachung ah ralkap sakhaan fa tete cheukhat an taang rih i thianhhlimhnak kan tuah cuahmah lio a si,” tiah a chim.
Thantlang khuachung ah SAC ralkap nih hmun an khuarnak hmun 2 a taang rih i cucu laak ding in kan i zuam cuammah, tiah a chim chap.
“Khuachung ah SAC ralkap sakhaan fa tete pahnih an taang rih. Cu hnu cu laak ding in kan i zuam lio a si. A rauh hlan ah kan laak lai tiah kan zumh. Kan laak khawh ahcun Thantlang peng chung ah SAC ralkap an thiang cang tinak a si,” tiah a chim.
CDF-Thantlang chimnak nawlngei nih, “Thantlang SAC ralkap sakhaanpi ah kan thanthar kan tar khawh cang. Hriamnam zong tam ngaingai kan laak. A taangmi SAC ralakp sakhaan pawl zong a rauh hlan ah kan laak ko lai,” tiah a chim.
Hakha le Thantlang karlak, Lungkhar le Auto Tlang ah a ummi SAC ralkap sakhaan pasarih cu Chinland Cozah ralkap nih July 22 in July 28 karlak ah an laak khawh hna i, nizaan August 4 zong ah Hakha-Thantlang karlak i C-3 SAC ralkap sakhaan zong an laak chap, tiah theih a si.
