CNA hruai mi Chinland Cozah ralkap phu komh nih May 23 ah Tonzaang khua pumpi in an laak khawh i SAC ralkap 40 hrawng an tlaih hna, meithal zun 100 hrawng an laak tiah theih a si.
Chinland ralkap phu komh nih an laak mi Tonzaang khua Palek Sakhan le Kha Lah Yah – 269 SAC ralkap sakhan laak than kawh nakding ah SAC nih faakpi in aa zuam. Helicopter in ralkap a chap hna caah kahdohnak a faak i, cu kahdohnak pawl ah cun SAC ralkap tampi a nung in an tlaih hna tiah theih a si.
“Nizan zanlei sml. 4:30 ah khan Tonzaang khua chung ah SAC ralkap an dih cang tiah chim khawh a si. Tlaih mi he a zaam mi he an si. 40 hrawng kan tlaih hna. Cu chung ah 15 hrawng cu hma an pu,” tiah Salai Htet Ni nih a chim.
A taang mi SAC ralkap pawl cu Tedim khua lei ah an zaam i, tlaih a tong mi ralkap pawl cu SAC nih helicopter in thazaang an rak chap mi pawl si dawh an si ti zong a chim.
Tonzaang khua kahdohnak cu May 17 in an thawk i SAC ralkap 20 leng an thi, Chinland ralkap nih meithal zun 100 hrawng le tangka kyats sing thong nga hrawng an laak khawh tiah kan theih.
Chinland ralkap phukomh lei zong in ram le miphun ca nunnak a pe mi an um tiah theih a si.
Photo: Tonzaang kahdohnak ah Chinland ralkap phu komh nih SAC hriamnam le tangka an laak mi an si
