Tedim peng, Keneddy tlang camp cu nihin June 22 zinglei ah kan laak țhan cang, tiah PDA-Tedim nih hmanthlak he a langhter.
PDF Zoland nih an rak laak mi Keneddy tlang SAC ralkap camp cu Tedim khua in aa thawh mi SAC ralkap 100 hrawng nih an va nam. PDF Zoland ralkap nih hnu an kirtaak hna caah SAC ralkap nih June 18 ah an rak laak.
Cu SAC ralkap camp cu tuzing ah Chinland Council ralkap nih an va laak țhan tiah theih a si.
Keneddy tlang camp lawng si lo in Taingen khua SAC camp zong Chinland Council ralkap kut ah a um ko tiah CDF-Hualngoram hruaitu Pu Puitea nih nihin June 22, Vaurawng Zuunthil ah a chim.
“Taingen zong kan kut ah a um ko. SAC ralkap nih voi hnih an rak kan nam i anmah lei fahnak a tam. Taingen khua Bethel ah SAC ralkap hmun an khuar lio. SAC ralkap camp hlun le a tlanghrawn cu kan ralkap pawl kut ah a um,” tiah Pu Puitea nih a chim
Taingen khua a phan mi SAC ralkap pawl cu CNA, CDF CDM-Siyin, PDA-Tedim, CDF-Hualngoram, CDF-Zanniatram, CDF-KKG le Kalay peng in SR6 nih an doh cuahmah hna tiah theih a si.
Taingen SAC camp cu January thla chung ah Chinland Council ralkap nih an rak laak mi a si.
