Chinram chung le India-Myanmar ramri ah rithaisii dohnak rian biapi in kan ṭuan lai tiah Chinland Council hruaitu hna a voi 3nak meeting ah biachahnak an ngei, tiah theih a si.
Rithaisii a zuartu hna nih atulio rambuainak hi caanṭha ah an i laak pin ah ralzaam sinak kha ningcang lo in an hman i ahlan nakin rithaisii faak khun in an zuar, tiah Chinland Council nih March 18 ah ca a chuah.
Cucaah, India ah aa dor mi Myanmar ralzaam hna nih India rampi upadi (law) kha ṭha te in zulh ding le rithaisii cawkzuarhnak thawngpang theih ahcun nawlngeitu sin ah thawngthanh ding in Chinland Council nih forhfialnak a tuah.
Chinland Council ukhruainak tang ah a um mi hmunram le India ramri thluangtluan ah rithaisii dohnak rian cu Chinland Cozah le Pengtlang ukhruaitu bu hna he ṭuanhma laak a si cang lai caah rithaisii a cingtu, a cawtu/a zuartu le aa chiahtu pawl theih an si ahcun phung ning in dantat a si lai, tiah Chinland Council nih theihternak a tuah.
