Atutan zarh chung ah tuah ding in an timhtuahmi Chinland Council le Chin Brotherhood karlak ton biaruahnak cu nicaan rikhiah um loin an let ṭhan, tiah thawng kan theih.
Kan hnu June thla chung ah khan Crisis Management Initiative (CMI) hruainak in Chinland Council le Chin Brotherhood cu Aizawl ah a voi khatnak ton biaruahnak an rak ngei bal cang i, atutan hi a voi 2nak Delhi ah tonnak ngeih ding in timhtuah a si nain humhimnak ruang ah ruah lo piin an hun let ṭhan.
Hi kong he pehtlai hin Chin Brohterhood secretary Robert nih, “I ton ding timi khuakhaannak a rawh thai bia a si lo. Kap hnih humhimnak kong ah tlamtlin lonak a um bia a si. Zeitik ah tonnak ngeih a si te lai timi a rih lo,” tiah Mizzima thawngzamhnak ah a chim.
Chinland Council le Chin Brotherhood karlak a voi 2nak tonnak kong hi Chin Brotherhood lei nih online in thawngpang a zuhter caah let a si, tiah CNF/CNA chimnak nawlngei Salai Htet Ni nih a chim.
Salai Htet Ni nih, “Hi tonnak kong hi CMI lei zong nih biapi tuk ah chia hna hlah sehlaw a dawh. CB lei zong nih hi tonnak kong hi online ah thawngpang an zuhter. Cucaahcun, cancel a si tiah an ti,” tiah a chim.
Chinland Council le Chin Brotherhood ton biaruahnak ngeih ding in a tawlreltu CMI cu Finland ram, Helsinki khua ah hram a bunhmi remnak sertu NGO a si i, bu khat le bu khat karlak remdaihnak sernak lei ah kum 20 leng rian a ṭuan cangmi a si, tiah kan theih.
