Ralkap nih Cozah thar a ser mi Chin State Administration Council ah tleicia Pu Terrance San Mawi Ni Khuai aiawhtu ding ah tiin Pu Thla Hre cu ralkap lei nih an sawm ko nain a cohlang hna lo tiah thawng kan theih.
Chin State Administration Council Chairman ca ah Pu Terrance San Mawi Ni Khuai a thih ka in khan an rak ka ngiat ngai cang tiah Pu Thla Hre nih The Hakha Post ah a chim.
“Council zung lei nih February 15 chun ah khan an ka auh i, Chairman tuan ding in an ka chimh. Atu ralkap lutlai Beu-Har-Hmu pa hi keimah he aa kom mi zong kan si fawn. Cun, lutlai a dangdang zong hi keimah he hawikom kan si dih ko hna. An ka fial hlan ah hin an rak ka ngiat ngai cang. Cozah kuttang ah rian a tuan cang mi ka si ca ah ka konglam (profile) pawl hi an rak i zoh cia dih. An zoh tik ah an lung ka tong ngai rua. Tuan ding in an vun ka sawm le cangka in ka chungkhar, ka fale dihlak he bia kan i ruah hmasa. Bia kan i ruah dih hnu ah mizapi duhlomi Cozah ah riantuan ding hi kan si kho lo tiin bia kan khiah. Bia kan khiah ning bantuk cun ka tuan kho lai lo, kan cohlang hna lo tiin ka leh ve hna nak hi a si. Cun, keimah pumpak hrimhrim nih mizapi duh lomi ukhruainak tang ah riantuan hi ka duh ve hrimhrim lo,” tiah Pu Thla Hre nih a chimchap.
Pu Thla Hre hi GAD zung ah kum 17 le State Municipal ah Director tiang a rak tuan bal mi a si. Cun, 2020 kum Myanmar ram party tling democracy thimnak ah Hakha Peng, Ramkulh Hluttaw No.1 ah Independent in aa zuam mi a si.
State Administration Council hruai ning hi Chairman pakhat le chungtel pahnih an um lai. Phunghram an ser cuahmah mi a phanh tik ah mi dangdang zong anmahle hmunhma cio ah an chiah hna lai. Nihin tiang SAC chung ah Chin Ramkulh in a fiang cang mi cu Pu Ngun San Aung lawng a si rih. Tedim Peng in an sawm mi Pu G0 Suan Khai cu voi hnih tiang a cohlan hna lonak ca a kuat hna nain, zei an let rih lo tiah kan theih.
