Chin Star hlasak zuamnak ah Judge a ṭuanmi minung pali le zuamnak ah aa telmi hlasatu minung pali cu zuamnak in an chuak, tiah thawng kan theih.
Chin Star hlasak zuamnak ah aa telmi Samson Khen Tui nih nu pakhat ningcang loin a tonghtham timi ruang ah Chin Star nih Samson Khen Tui cu Facebook Live in mizapi hmai ah biaceihnak an tuah hnu ah atu bantuk in buaibainak a hun chuah hi a si.
Chin ah judge a ṭuanmi Phoebe Phoenix nih October 29 ah Chin Star judge sinak in October 13 ah a rak i dinh cangnak kong mizapi theih in a thanh hnu ah a dang judge pawl le hlasak a zuammi hna zong nih zuamnak in an chuahnak kong thawngthanhnak an tuah ve.
Chin Star nih mi duhdannak policy a ngeihmi ruang ah kaa din tiah Phoebe nih a ti i, “Judges’ Special Power” timi nawlngeihnak hmang in micheukhat cu chance dang an pek tawn hna, tiah a langhter.
Chin Star Judge a ṭuan vemi Cung Awng, Katherine le Taung Hlaing zong nih Judge sinak in an i dinh kong an thanh cio i, hlasak zuamnak ah aa telmi hna Isabella Zing Dawt Par, Henry Bawi Uk Thang, Rebecca Van Dawt Cin le Samson Khen Tui zong zuamnak in an chuahnak kong thawng an thanh cio hna.
