Ralkap nih Cozah thar a ser mi State Administration Council chung ah chungtel tuan ding in an sawmmi NLD chungtel pakhat nih a cohlan ca ah, party lei nih February 25 ahkhan party chungtel sinak in an phuah tiah theih a si.
NLD party i cathanh an chuah ning ah, Chin Ramkulh NLD party chungtel Pu Hrang Cin Zaam cu State Administration Council ah chungtel ca ah an sawmmi a cohlan ca ah party chungtel sinak in kan dinhter hi a si tiah an langhter.
Pu Hrang Cin Zaam party chungtel sinak in an phuannak cathanh chung ah NLD Bahu party chungtel U Aung Kyi i minsen a thut mi zong hmuh a si.
Pu Hrang Cin Zaam party nih an phuah mi kong he pehtlai in U Aung Kyi nih, “Hi bantuk kong hi social media ah kan langhter bal lo. Asinain, atu hi ramhuap si loin Ramkulh chung men i a can tik ah lung a tha lo. Hi bantuk tiang a tuah ca ah hi bantuk tholung a si mi hi mizapi nih thei hna seh ti ka duh ca ah social media ah keimah pumpak in ka langhter mi hi a si,” tiah February 25 ahkhan a Facebook cahmai ah a langhter.
NLD party hi, party chung in dantatnak le sualphawt a tongmi hna kong ah anmah NLD Facebook chung in an langhter bal lo ti hi hmuh khawh a si.
Pu Hrang Cin Zaam hi 2021 February 16 ahkhan State Administration Council chung ah riantuan ding in an sawm i, a voi khatnak ahcun a rak cohlan. Asinain, rian khinh mi a cohlan hna hnu February 26 ah, rian nan ka khinh mi ka cohlang kho than lo, ka tuan kho lai lo tiah a leh ve hna.
