Chin Ramkulh, Falam khuapi pawng ah tuah mi Surbung vanlawng tual cu tlamtling tein lim a si cang ko nain COVID-19 zawtnak ruangah a tu tiang honnak tuah khawh a si rih lo tiah Chin Ramkulh Lamsul lei Minister Pu Sui Thio sin in thawng kan theih.
Surbung vanlawng tual hi Budget 37 billion dih in tuah mi a si i, Flight Test zong ni hnih chung an rak tuah cang tiah thawng kan theih.
Surbung vanlawng tual hon khawh a si rih lomi kong he pehtlai in Minister Pu Sui Thio nih,“A hlan i kan rak i timh ning le kan rak tuaktan cia ning ahcun October thla chung ahhin honnak tuah ding a rak si. Asinain COVID-19 zawtnak tilet a voi hnihnak nih a vun kan phak ca ah kan let than. Zeitik ahdah hon a si than te lai ti cu Cozah lei nih a tuaktan than te lai,” tiah The Hakha Post ah a chim.
Hi Surbung vanlawng tual hi a sau pee 6000 le a kauh lei pe 100 in tuah mi a si i, khualtlawng minung 70 tlum ATR-72 vanlawng a tum lai tiah theih a si.
Cun, Sipin le Electric Minister Pu Soe Htet nih, “Vanlawng tual hi zatuak in 98% cu liim a si cang. A voi khatnak Flight Test tuah lio ahkhan tlang pahnih chimh ding a taang i cucu atu hi tuah cuahmah a si. Tlang chimh mi zong hi a dih cang ti awktlak a si ko cang. Vanlawng a tum ding lawng a taang cang,” tiah The Hakha Post ah a chim.
Surbung Vanlawng tual simanking hi a hlan President U Thein Sein chan in rak i timh le tawlrel cia a si i, 2015 Cozah thar nih a hram an thok i atu ah zatuak 98% tluk cu aa lim cang tiah kan theih.
