Chin Ramkulh Sipin Lutlai Pu Thla Hre cu amah nih dinhnak (pension) a hal bantuk in Chin Ramkulh Cozah (Cabinet) nih August 14 ah dinhnak an pek cang, tiah kan theih. 
“Amah pumpak nih dinhnak ca a chiah bantuk in Cabinet nih kan ceihpiak i lungtlin biachahnak kan tuahpiak cang. Hihi rian dinhnak phung caang 53 (A) ning in dinhter zong a si,” tiah Chin Ramkulh Cozah Sipin Minister le Chimphuannak Nawlngeitu U Soe Htet nih The Hakha Post ah a chim.
Hi rian dinhnak kong ah amah Pu Thla Hre nih, “Kaa dinh caan a phan ve cang hrimhrim. Pension laak caan zong a za cang i atu bantuk in dinhnak ca ka tial hi a si. Ka tuan caan chung ah i chirnak ngeilo in ka tuan ko tiah kaa ruah. Ka kutneh tete zong nan hmuh len ko lai ti zong ka zumh. Keimah kaa ruahnak ahcun diriam tein ka tuan ko i ka caan chung ah ka tuah khawh mi tampi a um ve ko. Amah belte, ka tuah khawh lo mi zong a um ve ca ah ka sia a herh ngaingai. Keimah a ka chaangtu ding nih a si khawh chung in a hun tawlrel te ko lai. Cun, atu hi aa din ding ka si cang ca ah cazin chektu zong ka auh hna i an ka chek lio a si. Kaa dinh khawh lecangka mizapi, “media he tonbiaruahnak (Press Conference) zong tuah kaa tim,” tiah The Hakha Post ah a chim.
Pu Thla Hre cu Penguk Zung ah kum 17 chung UD dirhmun in rian a tuan i Sipin ah kum 23 tiang rian a tuan mi a si. Chin Ramkulh, a bik in Hakha khuachung ah a kutneh zong tampi hmuh khawh a si.
